Топ Шеф е американско реално тв шоу, кое се прикажува на кабловската телевизија Браво и во кое готвачите се натпреваруваат меѓу себе во кулинарски предизвици. Тие се оценувани од професионални готвачи и други истакнати луѓе од светот на храната и виното. Наградата е уредувачка функција во списанието Храна и Вино, појавување на Food & Wine Classic во Аспен, Колорадо и 125 000 долари. Шоуто е продуцирано од Magical Elves Productions, креаторите на Проект Писта. Во Америка моментално се прикажува седмата сезона, а кај нас половина од првата сезона се прикажуваше на Скај Нет.
Планирани се и 4 Топ Шеф спин-офа. Браво го нарача Top Chef Junior, чии натпреварувачи се во раните тинејџерски години. Вториот спин-оф, Top Chef: Masters, започна да се прикажува во јуни 2009, вклучувајќи едни од најсјајните ѕвезди во светот на храната, наградувани и познати готвачи. Третиот спин-оф, Top Chef: Just Desserts е исто така нарачан, а четвртиот, Top Chef Canada, е продуциран од Food Network Canada и е закажан за 2011 година.
Секоја епизода, освен финалето, има по два предизвика. Во Quickfire предизвикот, секој готвач треба да зготви јадeње со посебни барања (на пример, употреба на одредени состојки) или да учествува во предизвик поврзан со кулинарството (на пример, тестирање на вкусот). Тие најчесто имаат најмногу 1 час да ја завршат задачата. Гостински судија избира еден или повеќе готвачи како најдобри во предизвикот. На почетокот на сезоните, победниците во овој предизвик добиваат имунитет за следниот елиминационен предизвик. Со намалување на бројот на натпреварувачи, тие веќе не добиваат имунитет, туку некоја друга награда, како на пример, да бидат капитен на тимот за наредниот предизвик.
Во предизвикот на елиминација, готвачите треба да подготват едно или повеќе јадења, во однос на барањата. Некои од овие предизвици се индивидуални, а некои тимски. Тимовите се бираат на различен начи, но најчесто со влечење на означени ножеви. Готвачите имаат од неколку часа до неколку дена да ја завршат задачата. Состојките се најчесто ограничени на оние кои ги има во оставата на Топ Шеф и на тоа што ќе си купат во продавницата, имајќи ограничен буџет. Сепак, некои предизвици може да го ограничат бројот на состојки кои може да се користат, а некои бараат нетрадиционални методи на собирање состојки, како на пример, прашување на луѓе од врата на врата. Натпреварувачите готват за четирите судии, вклучувајќи еден судија-гостин, но често готват и за група гости или муштерии (на пример, каубојите во Колорадо). Сите тие ја пробуваат и оценуваат храната.
По елиминациониот предизвик, готвачите се донесени пред масата на судиите, каде што тие ги разгледуваат коментарите на гостите и ги бираат најдоброто и најлошото јадење. Најдобрите тимови или готвачи се повикани и понекогаш прашувани за нивните јадења. Еден од нив е победник и може да добие награда од судијата-гостин. Потоа се повикуваат најлошите и по сличен разговор се избира најлошиот готвач, кој треба да си ги спакува ножевите и да си оди.
Шоуто продолжува на сличен начин уште 10-13 епизоди, се до финалето.
Специјални предизвициНа средината на секоја сезона, натпреварувачите учествуваат во елиминационен предизвик наречен "Restaurant Wars" (или нешто слично). Тие се поделени во 2 тима, креирани од победникот на Quickfire предизвикот или со влечење ножеви. Во овој предизвик, готвачите мора да претворат празно место во ресторан за одредено време и со ограничен буџет, избирајќи име, тема, декор и мени.
Во финалниот предизвик, преостанатите 2 или 3 готвачи подготвуваат ручек или вечера, составена од повеќе јадења со помош на други готвачи. Овие помошни готвачи се или некои од претходно елиминираните или некои познати готвачи. Победникот се бира според неколку фактори, квалитетот на храната, способноста да ги водат избраните готвачи и работата за време на целото шоу.