Наша ТВ

Година на отворање: 2008

Станува збор за национална и сателитска телевизија, која е продукциски континуитет на маркетинг-агенцијата „Арт улица 26“ во креирањето на програмата на скопската телевизија Скај нет. Поточно, програмата што досега се емитуваше на Скај нет отсега гледачите ќе ја следат на фреквенцијата на Наша ТВ, која преку кабелските оператори стигнува до домовите на граѓаните низ целата земја. Целокупната екипа што стоеше зад програмата на локалната телевизија Скај нет сега ја подготвува програмата на Наша ТВ. Генерален менаџер е Ристо Гоговски.

Јанко Илковски ја емитува својата емисија „Јади бурек“ на Наша ТВ. Емисијата е продукциски збогатена, со ново студио и сценографија, но со ист концепт и во ист термин - секој работен ден во 22.22 часот. Гледачите ќе може да ги гледаат и програмскиот концепт „Кажи и направи нешто добро за Македонија“, отворената програма „Ало Скопје“, која го вклучува проектот „Го сакам Скопје“, сатиричниот коментар „Времето денес“, информативно-едукативниот концепт „За бизнисот“, видеоесејот „За балансот“, атрактивните видеа „Фото бекстејџ“, репортажи, документарни филмови, концерти, македонските играни филмови... Сето тоа е само мал дел од она што се подготвува дел од сопствена, а дел од преземена продукција (документарни и играни филмови, репортажи, ТВ-серии и слично). Фреквенцијата на која се емитува Наша ТВ е определена од кабелскиот оператор што ја пренесува.